मोदी सरकार के दो साल पर हरियाणवी महिलाओं का गीत

म्हारा मोदी घर पै आया, दो साल मैं घर पै आया ,
सारी दुनिया मैं घुमकै ल्यो सुणल्यो के के ल्याया।

मंगोलिया जा कै आया, निशाना ला कै आया,
दो बिलियन देकै आया, एक खचचर लेकै आया,
इतना महंगा खचचर तनै कुनसै काम लगाया।
सारी दुनिया मैं घुमकै ल्यो सुणल्यो के के ल्याया।

अमरीका घूमके आया, एक चस्मा टोपी ल्याया ,
कालाधन क्यूँ नहीं ल्याया , तो 15 लाख नहीं ल्याया ,
मन्नै दो दिन ध्याड़ी छोड़के खाता भी खुलवाया ,
 सारी दुनिया मैं घुमकै ल्यो सुणल्यो के के ल्याया।

जापान मैं जाकै आया, औडै पूल मैं नहाकै आया ,
आबे न लेकै आया , उनै गँगा घाट दिखाया ,
मोदीजी तेरी बाट मैं,यो महाराष्ट्र मरै तिसाया ,
 सारी दुनिया मैं घुमकै ल्यो सुणल्यो के के ल्याया।

जब हरियाणा जलरया था, मोदी तू कित बडरया था,
तेरी गवर्नेंस का पारा म्हारी सड़कां पै खिंड रया था,
ना संसद अंदर पाया ना ट्वीटर ऊपर पाया ,
 सारी दुनिया मैं घुमकै ल्यो सुणल्यो के के ल्याया।

तू जर्मनी जाकै आया, तू यूरोप जाकै आया,
तेरा दबदबा पूरी दुनिया मैं बोलें छाया ,
तू इटली के अपराधी बता क्यूँ छोड़के आया ,
 सारी दुनिया मैं घुमकै ल्यो सुणल्यो के के ल्याया।

सोच्या पाकिस्तान जावैगा, दस सिर लेके आवैगा ,
दाऊद इब्राहिम नै गोड्यां तलै दाब ल्यावैगा ,
तू हलवा खाकै आया , तू केक काटकै आया ,
 सारी दुनिया मैं घुमकै ल्यो सुणल्यो के के ल्याया।